ដោយ ដែន ចែងចាំង

ភ្នំពេញ៖ ដើម្បីបង្កបរិយាកាសសប្បាយរីករាយ ដល់អតិថិន ម្ចាស់ផ្សាររាត្រីកុងទីណ័រ ”ភូមិមូល” នឹងរៀបចំកម្មវិធីពិសេសមួយ ដោយមានការចូលរួមសម្តែងពីតារាល្បីៗ ក្រុមបង្ហាញម៉ូត និងក្រុមម៉ូតូធំនាថ្ងៃចុងសប្តហ៍នេះ។

លោកសោម កែវម៉ាលីដា តំណាងម្ចាស់ផ្សាររាត្រីកុងទំណ័រ”ភូមិមូល” ស្ថិតនៅលើបណ្តោយផ្លូវ១៩៨៦ ស្ថិតក្នុងសង្កាត់ភ្នំពេញថ្មី ខ័ណ្ឌសែនសុខ(ទល់មុខសាកលវិទ្យាល័យលឹម​កុកវីង) បានមានប្រសាសន៍ឲ្យដឹង តាមទូរស័ព្ទនាល្ងាចថ្ងៃទី២៣ មិនានេះថា ផ្សាររាត្រីកុងទំណ័រ “ភូមិមូល”នៅតែបើកដំណើរការធម្មតា ចាប់ពីម៉ោង៦ ដល់១២យប់។ លោកបន្តថា ផ្សារនេះតែងតែមានកម្មវិធីពិសេសៗ សម្រាប់បំរើការកំសាន្តសប្បាយរបស់អតិ​ថិជន ជាក់ស្តែងនៅថ្ងៃទី២៤ និងថ្ងៃទី២៥មិនានេះ ផ្សាររាត្រីកុងទំណ័រនឹងមានការចូលរួមសម្តែងពីតារាចម្រៀងសាន ផានិត ក្រុមបង្ហាញម៉ូត និងក្រុមម៉ូតូធំ។

ចំណែក​ថ្ងៃទី២៥ មិនាចាប់ពីម៉ោង៦ដល់១២យប់ នឹងមានការចូលរួមសម្តែងរបស់តារាចម្រៀងOriginal Song ក្រុម DJ មកពីប្រទេសថៃ និងក្រុមម៉ូតូធំផងដែរ។

លោកសោម កែវម៉ាលីដាបានបន្តថា ផ្សាររាត្រីកុងទីណ័រភូមិមូលបានចាប់ផ្តើមបើកដំណើរការចាប់ពីថ្ងៃទី២៨ ខែធ្នូ ឆ្នាំ២០១៧ រហូតមកទល់ពេលនេះទទួ​លបានការគាំទ្រយ៉ាងខ្លាំងពីអតិថិជន ដែលភាគច្រើនជាប្រជាជនមានជីវភាពថ្នាក់កណ្តាល និងក្រុមយុវជន ដែលនិយមទៅទទួលទានអាហារ និងភេសជ្ជៈនា​នាក្នុងផ្សារដ៏ទាក់ទាញមួយនេះ។

ផ្សាររាត្រីកុងទីណ័រភូមិមូល ស្ថិតនៅលើផ្ទៃដី២៤០០ម៉ែត្រការ៉េ ចែកចេញជាស្តង់ចំនួន៧២ ដោយមានអាហារពិសេសៗដូចជា បបរកង្កែប មីហិរ ភោជនី​យដ្ឋានចម្រុះ បារ៍កម្សាន្តអារម្មណ៍ជាដើម៕

ដោយ វុត្ថា

ភ្នំពេញ៖ សម្តេចតេជោនាយករដ្ឋមន្ត្រី ហ៊ុន សែន បានសម្តែការដឹងគុណយ៉ាងខ្លាំងចំពោះរដ្ឋាភិបាលចិន ដែលជានិច្ចជាកាលតែងតែជួយដល់ការអភិវឌ្ឍហេដ្ឋារចនាសម្ព័ន្ធក្នុងប្រទេសកម្ពុជា។

សម្តេចបានមានប្រសាសន៍ ក្នុងពិធីបើកការដ្ឋានសាងសង់ផ្លូវជាតិលេខ១១ ពីអ្នកលឿង ទៅកាន់តំបន់ថ្នល់ទទឹង ក្នុងស្រុកត្បូងឃ្មុំ ខេត្តត្បូងឃ្មុំនាព្រឹកថ្ងៃទី២៣ មិនានេះថា “ប្រទេសចិនមិនត្រឹមតែអភិវឌ្ឍន៍ខ្លួនឯង ឲ្យបានរីកចម្រើនប៉ុណ្ណោះទេ តែចិនក៏បានចូលរួមចំណែកជួយអភិវឌ្ឍន៍ ប្រទេសជិតខាងមួយចំនួនផងដែរ ជាក់ស្តែងដូចប្រទេសកម្ពុជា”។

ការសាងសង់ឡើងវិញផ្លូវជាតិលេខ១១ និងផ្លូវវាងប្រវែងសរុប៩៦,៤៨គីឡូ ម៉ែត្រនេះ មានតម្លៃជាង៩៤លានដុល្លារអាមេរិក។

សម្តេចតេជោហ៊ុន សែនបានសម្តែងនូវមោទនភាពជាខ្លាំង ចំពោះទំនាក់ទងជាដៃគូយុទ្ធសាស្ត្រគ្រប់ជ្រុងជ្រោយ ជាមួយមិត្តចិន ដែលអាចចាត់ទុកថាជាការដើរបន្តតាមព្រះរាជសកម្មភាព ព្រះបរមរតនកោដិ សម្តេចព្រះ នរោត្តម សីហនុ ដែលកន្លងមកព្រះអង្គបានផ្សាភ្ជាប់ និងមានទំនាក់ទំនងល្អយ៉ាងជិតស្និទ្ធជាមួ​យថ្នាក់ដឹកនាំប្រទេសចិន។ តាមរយៈទំនាក់ទំនងទាំងអស់នេះ គឺបានផ្តល់នូវផលប្រយោជន៍ រវាងប្រទេសទាំងពីរឲ្យគ្នាទៅវិញទៅមក។

សម្តេចបន្តថា “យើងមានទំនាក់ទំនងល្អជាចិន គឺមិនខុសទេ ហើយវាក៏ស្របតាមព្រះរាជគន្លងរបស់សម្តេចឪ ព្រះបរមរតនកោដ្ឋ ព្រះបីតាជាតិយើងផងដែរ។ សម្តេចឪមានទំនាក់ទំនងល្អជាមួយចិន តាំងពីចិនមិនទាន់ចូលអង្គការសហសហប្រជាជាតិមកម្លេះ គឺតាំងជំនាន់មេដឹកនាំចិនសម័យមុនៗ…ម៉ៅសេទុង ជូអីនឡាយ”។

ឯកអគ្គរដ្ឋទូតសាធារណៈរដ្ឋប្រជាមានិតចិន ប្រចាំកម្ពុជាលោកស្យុង ប៉រ បានថ្លែងដែរថា ជំនួយរបស់ចិន គឺជាជំនួសដោយសមធម៌ សុច្ចរិតភាព បើកចំហ គ្មានលក្ខខ័ណ្ឌ និងមិនស្ថិតនៅក្រោមស្ថានភាព នយោបាយណាមួយឡើយហើយ​ការ«ជួយកម្ពុជា គឺជួយដោយស្មោះស្ម័គ្រ”។

រហូតមកដល់ពេលនេះ ប្រទេសចិនបានផ្តល់ជំនួយក្នុងការសាងសងស្ពានដល់កម្ពុជាចំនួន៧រួចមកហើយ ដែលចំណាយអស់ទឹកប្រមាណជាង២១៦ លានដុល្លារអាមេរិក និងកំពុងសាងសងស្ពានមួយទៀត ដែលត្រូវឆ្លងពីស្រុងស្ទឹងត្រង់ ក្នុងខេត្តកំពង់ចាម ភ្ជាប់ទៅកាន់ទៅស្រុកក្រូចឆ្មារ ខេត្តត្បូងឃ្មុំ ដែលបានបើកការដ្ឋានសាងសង់កាលពីខែមុន។

បន្ថែមពីនេះ ប្រទេសចិនក៏បានផ្តល់ជំនួយជាច្រើនដល់ស្ថាប័នជាតិសំខាន់ៗរបស់ប្រទេសកម្ពុជាផងដែរ។

ការជួយលើកគ្រប់ផ្នែករបស់ប្រទេសចិន មកលើប្រទេសកម្ពុជាយ៉ាងច្រើនសន្ធឹកសន្ធាប់បែបនេះ ដោយសារតែប្រទេសចិន ចង់ពង្រីកអំណាចរបស់ខ្លួនក្នុងតំបន់អាស៊ាន និងស្របតាមគោលនយោបាយរបស់លោកប្រធានធិបតី ដែលទើបតែលជាប់ឆ្នោតជាប្រធានាធិបតីជាថ្មីម្តងទៀត គឺលោក Xi Jinping ផ្លូវមួយ   ខ្សេក្រវាត់មួ (One Belt One Road Initiative)  ក្នុងការដាក់ចេញជាយុទ្ធសាស្ត្រពង្រីអំណាចសេចកិច្ចរបស់ខ្លួន៕

ដោយ ដែន ចែងចាំង

ភ្នំពេញ៖ ក្រុមហ៊ុនចំនួនពីរ ដែលមានមូលដ្ឋាននៅប្រទេសចិន បានត្រៀមទាញយកប្រភពទឹកពីវារីអគ្គិសនីកំចាយ ដើម្បីផលិតទឹកស្អាត សម្រាប់ការចែកចាយគ្របដណ្តប់លើវិសាលភាព ខេត្តកំពត និងខេត្តកែប។

ក្រុមហ៊ុនចិនចំនួនពីរ ដែលគ្រោងទាញយកប្រភពទឹកពីភ្នំកំចាយយកមកប្រើប្រាស់នោះ រួមមានក្រុមហ៊ុនChina Energy Engineering Corporation Limited និងក្រុមហ៊ុនPower China Cambodia of Sinohydro Co,Ltd ដែលជាក្រុមហ៊ុនចំណុះរដ្ឋ នៃសាធារណរដ្ឋប្រជាមានិតចិន។

ក្នុងជំនួបជាមួយថ្នាក់ដឹកនាំក្រុមហ៊ុនទាំងពីរ លោកចម ប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម និងសិប្បកម្មបានថ្លែងកាលពីម្សិលម៉ិញថា គំរោ ងទាញយកប្រភពទឹកពីវារីអគ្គិសនីកំចាយ ខេត្តកំពត ក្រសួងមានគោលការណ៍រួចហើយ ក្នុងការទាញយកប្រភពទឹកប្រមា​ណ​ពី១៥ ទៅដល់២៥លានម៉ែត្រត្រីគុណក្នុងមួយឆ្នាំ ដើម្បីផលិតទឹកស្អាត ក្នុងសមត្ថភាព៦ម៉ឺនម៉ែត្រត្រីគុណក្នុងមួយថ្ងៃ។

លោកបន្តថា“យើងគោលដៅផ្តត់​ផ្គង់ទឹកស្អាត ដើម្បីគ្របដណ្តប់ក្នុងវិសាលភាពខេត្តចំនួនពីរ គឺខេត្តកំពត និងខេត្តកែប ដែលជាខេត្តប៉ូលទេសចរណ៍ តំបន់ឆ្នេរដ៏សំខាន់របស់កម្ពុជា”។

លោកចម ប្រសិទ្ឋបន្តថា ទោះបីគម្រោងនេះ ត្រូវចំណាយលុយអស់ច្រើនយ៉ាងណាក៏ដោយ តែថ្លៃទឹកគឺត្រូវលក់ក្នុងតម្លៃ សមរម្យដល់ប្រជាពលរដ្ឋ និងជាទឹកដែលមានគុណភាព សុវត្ថិភាព និងនិរន្តរភាព។ ក្រសួងនឹងយកជាមូលដ្ឋានដើម្បីពិចារណា ជាពិសេសគឺការស្វែងរកប្រភពទុន ប្រសិនយើងបានទទួលប្រភ​ពទុន ជាប្រភេទជំនួយឥតសំណង រឺកម្ចីឥណទានការប្រាក់ទាប យើងនឹងអាចផលិតទឹកផ្គត់ផ្គត់ដល់ប្រជាពលរដ្ឋ ក្នុងតម្លៃទាបសមរម្យនិងអាចឲ្យប្រ​ជា​ពលរដ្ឋយើងមានទឹកស្អាតប្រើប្រាស់ ដែលមានបណ្តាញតដល់ផ្ទះ ជាពិសេសការជៀសផុតពីការឆ្លងជំងឺផ្សេងៗ ដោយសារការប្រើទឹកមិនស្អាតជាដើម។

ខេត្តកែប និងកំពតកំពុងកើនឡើងនូវការអភិវឌ្ឍ ដែលធ្វើឲ្យកំនើនប្រជា​សាស្រ្តកើនឡើងជាប្រចាំ ដែលធ្វើឲ្យកង្វះទឹកសាបប្រើប្រាស់បានក្លាយជាបញ្ហា​ប្រឈមមួយ ក្នុងចំណោមបញ្ហាប្រឈមជាច្រើនក្នុងខេត្ត​ ដែលមានសក្តានុពល​ទាក់ទាញភ្ញៀវទេសចរណ៍ជាតិ អន្តរជាតិនេះ៕

ដោយ គង់ សូរិយា

ភ្នំពេញ៖ ថ្នាក់ដឹកនាំនៃក្រុមអ្នកធ្វើអាជីវកម្មស្របច្បាប់នៅកម្ពុជា ប្រមាណ​១២០ក្រុម​ហ៊ុន បានមកជួបជុំគ្នាក្នុងកម្មវិធី Business Open Day ដើម្បីជួបជុំសមាជិក និងអ្នកជំនួញនា​នា ដែលមានអាជីវកម្មស្របច្បាប់នៅកម្ពុជា។

ប្រធានថ្នាក់ដឹកនាំ BNI Master ជំនាន់ទី៦ លោកសេង សុភាពបានមានប្រសាសន៍ឲ្យ​ដឹង ក្នុងពិធី​ជួប​ជុំគ្នានាព្រឹកថ្ងៃទី២២ មិនានេះថា គោលបំណងចម្បងនៃការរៀបចំ​កម្មវិធី Business Open Day ដើម្បីផ្លាស់ប្តូរទំនាក់ទំនងអាជីវកម្មរវាងសមាជិក និងសមាជិក ក៏ដូច​ជាអ្នកជំនួញទូទៅ ដែលបានមកចូលរួមផងដែរ។ ​លោកបន្តថា ការជួបជុំនេះក៏ដើម្បី​ធ្វើការ​ផ្លាស់​ប្តូរគំនិតយោបល់ និងចែករំលែកបទពិសោធន៍អាជីវកម្មពីគ្នាទៅវិញទៅមក ដើម្បីធា​នា​ថា អាជីវកម្មរបស់ពួកគេអាចឈានទៅមុខបាន និងមានការប្រកួតប្រជែងក្នុងទីផ្សារសេរី ស្របពេលដែលកម្ពុជាក្លាយជា​សមាជិក​អាស៊ាន​។

លោកបន្តថា “តាមរយៈជំនួបនេះយើងក៏នឹងផ្តល់ជូនសមាជិក និងអ្នកចូលរួមនូវទំនាក់​ទំនងដោយផ្ទាល់ជាមួយអ្នកជំនួញ​ក្នុង និងក្រៅប្រទេស ឱ្យស្គាល់ពីសេវាកម្មរបស់ខ្លួនងាយ​ស្រួលក្នុងការប្រាស្រ័យទាក់ទងគ្នា ឬអាចជួយគ្នាបាន នៅពេលមាន​តម្រូវការ និងពង្រីកអាជី​វ​កម្មរបស់ខ្លួនឱ្យទាន់សម័យកាល”។

ទោះជាយ៉ាងណាលោកសេង សុភាពស្នើឱ្យម្ចាស់អាជីវកម្មទាំងតូច មធ្យម និងខ្នាតធំ​នៅ​កម្ពុជាទាំងអស់ គួរចូលរួមជាមួយគ្នាជាក្រុម ដើម្បីភា​ពរឹងមាំក្នុងអាជីវកម្ម និងអាចឈរ​ជើង​ នៅក្នុងទីផ្សារសេរីមួយនេះបានយូរអង្វែង ពិសេសមានការរីកចំរើន ក្នុងអាជី​វ​កម្មបាន​យ៉ាងឆាប់រហ័ស។

គិតរហូតមកដល់ពេលនេះ BNI Master មានសមាជិកជិត៥០០ក្រុមហ៊ុន ហើយកំពុង​បន្តបញ្ចូ​លសមាជិកថ្មីជាបន្តបន្ទាប់ អាចនឹងកើនដល់៥៥០ក្រុមហ៊ុន នៅក្នុងពេល​ដ៏ខ្លីខាងមុខ​នេះ៕

ដោយ គង់ សូរិយា

ភ្នំពេញ៖ តាមរយៈជំនួប ដើម្បីលើកឡើងពីកង្វល់ និងដោះស្រាយបញ្ហាប្រ ឈមរវារវិស័យរដ្ឋ និងឯកជន ទីបំផុតរដ្ឋាភិបាលនិងវិស័យឯកជនបានឯកភាពគ្នា និងដោះស្រាយបញ្ហារួមគ្នាបានចំនួន៧ចំណុច។

កិច្ចប្រជុំដែលមានការចូលរួមពីទេសរដ្ឋមន្រ្តីអូន ព័ន្ឋមុនីរ័ត្ន រដ្ឋមន្រ្តីក្រសួង​សេដ្ឋកិច្ច និងហិរញ្ញវត្ថុ និងលោក Bretton G. Scaironi សហប្រធានក្រុម “ឃ” ផ្នែកឯកជនកាលពីម្សិលម៉ិញ បានរកឃើញដំណោះស្រាយចំនួន៧ចំណុច និងបានពិភាក្សា ដើម្បីរកដំណោះស្រាយ រួមមាន វិវាទសារពើពន្ធ សេចក្តីព្រាងច្បាប់ស្តីពីបរធនបាលកិច្ចហិរញ្ញវត្ថុ ឧស្សាហកម្មថ្នាំជក់ ប័ណ្ណការងារសម្រាប់នាយកក្រុមហ៊ុនM&A ការប្រកាសជូនដំណឹងស្តីពី ការបើកសហគ្រាសសម្រាប់ក្រុមហ៊ុនមេ និងភាពជានាយកក្រុមហ៊ុន នៅក្នុងពហុក្រុមហ៊ុន អាករបំភ្លឺសាធារណៈ លើការលក់ស្រាបៀរ ដោយអ្នកចែកចាយ និងឧស្សាហកម្មរថយន្តជាដើម។

លោកទេសរដ្ឋមន្រ្តី អូន ព័ន្ធមុនីរ័ត្ន ទេសរដ្ឋមន្ត្រីបានថ្លែងថា “ការខិតខំប្រឹងប្រែងដោះស្រា​យបញ្ហានៅក្នុងវិស័យឯកជន ជាការរួមចំណែកបង្កើតនូវបរិយាកា​សកាន់តែល្អប្រសើរឡើង ចំពោះការធ្វើធុរកិច្ច និងការវិនិយោគនៅកម្ពុជា”។ លោកបានបន្ត​ថា “បច្ចុប្បន្នរាជរដ្ឋាភិបាល មានឆន្ទៈយ៉ាងមុះមុតឥតរាថយ ក្នុងការកែលម្អបរិស្ថានវិនិយោគ និងធុរកិច្ច ជាពិសេសការបន្តរៀបចំប្រព័ន្ធច្បាប់ និងលិខិតបទដ្ឋានគតិយុត្តទាំងឡាយ ដើម្បីទ្រទ្រង់ដល់ធុរកិច្ច និងពង្រឹងការប្រកួតប្រជែងស្មើភាព និងយុត្តិធម៌ ដើម្បីលើកស្ទួយកំណើនសេដ្ឋកិច្ចជាតិ”។

លោកបន្តថា រាជរដ្ឋាភិបាលមានការយកចិត្តទុកដាក់ខ្ពស់ ក្នុងការដោះស្រាយបញ្ហា និងការបារម្ភរបស់វិស័យឯកជន និងបានអំពាវនាវដល់ផ្នែកឯកជន ចូលរួម ក្នុងការពង្រឹងយន្តការភាពជាដៃគូរវាងរាជរដ្ឋាភិបាល និងវិស័យឯកជន និងអំពាវនាវ ដល់ផ្នែកឯកជនឱ្យពង្រឹងការងាររួមគ្នា សម្របសម្រួលបង្កើតបានជាសំឡេងតែមួយ សម្រាប់ធ្វើការពិភាក្សាជាមួយរាជរដ្ឋាភិបាល ដើម្បីកាត់បន្ថយនូវការលើកឡើងបញ្ហាជាន់គ្នា ការបង់ពន្ធលើពេលវេលា និងបាត់បង់ប្រសិទ្ធភាពការងារ និងការបន្តកិច្ចខិតខំប្រឹងប្រែងដោះស្រាយ នូវក្តីកង្វល់របស់វិស័យឯកជននេះបន្តទៅមុខទៀត៕