អ្នកជំនាញជំរុញឲ្យរដ្ឋាភិបាលពន្លឿនការរៀបចំប្លង់គោលនៅតាមក្រុងនីមួយៗ

February 22, 2018

ដោយ គង់ សូរិយា

ភ្នំពេញ៖ អ្នកជំនាញក្នុងវិស័យអចលនវត្ថុកម្ពុជា និងមន្រ្តីជំនាញផ្នែកនគរូបនីយកម្មបានជម្រុញឲ្យរដ្ឋាភិបាល បង្កើនល្បឿនរៀបចំប្លង់គោលនៅតាមទីក្រុងនិមួយៗ ដើម្បីកាត់បន្ថយបញ្ហាប្រឈមជាច្រើននៅពេលអនាគត។

ប្រធានក្រុមប្រឹក្សាភិបាលនៃក្រុមហ៊ុន Hutton CPL លោកឧកញ៉ា ចេង ខេង បានថ្លែងឲ្យដឹងតាមទូរស័ព្ទកាលពីម្សិលម៉ិញនេះថា រដ្ឋាភិបាលគួរពន្លឿនរៀបចំប្លង់គោលនៅតាមទីក្រុងនិមួយៗ ដើម្បីសម្រួលបញ្ហាកកស្ទះចរាចរណ៍ ការរំលោ ភចិញ្ចើមផ្លូវ និងបញ្ហាសណ្តាប់ធ្នាប់សាធារណៈដទៃទៀត។លោកបន្តថា នៅពេលប្រជាជនកាន់តែមានជីវភាពធូរធារ បញ្ហាសង្គម ការកកស្ទះចរាចរណ៍នឹងកើនឡើង ហេតុនេះវានឹងធ្វើឲ្យមានបញ្ហាសតិអារម្មណ៍ និងឈឺក្បាលច្រើននៅពេលធ្វើដំណើរ។

លោកបន្តថា “យើងមិនអាចនៅបន្តរឿងឈឺក្បាល ដោយសារទីក្រុងគ្មានចិញ្ចើមថ្នល់សម្រាប់ដើរ មានការកកស្ទះចរាចរណ៍ស្ទើរគ្រប់ពេលវេលាបានទេ”។ លោកបន្តថា “រដ្ឋាភិបាលគួររៀបចំប្លង់គោល ប្លង់អភិវឌ្ឍន៍មួយឲ្យបានច្បាស់លាស់ ដើម្បីសង្គមរបស់យើង ប្រទេសរបស់យើងមានរបៀបរៀបរយ”។

អ្នកជំនាញផ្នែកនគរូបនីយកម្ម លោកបណ្ឌិតវ៉ាន់ វ៉ាតបានថ្លែងថា ការរៀបចំប្លង់គោលមានសារៈសំខាន់ណាស់ ដើម្បីយើងអាចដឹងថាតំបន់ណាគួរប្រើប្រាស់ដីបែបណា ឬដីទីតាំងណាគួរប្រើសម្រាប់វិស័យកសិកម្ម សម្រាប់វិស័យលំនៅដ្ឋាន ក៏ដូចជាវិស័យឧស្សាហកម្ម។ លោកបន្តថា ការរៀបចំនិងអនុវត្តន៍តាមប្លង់គោល ធ្វើឲ្យកយើងដោះស្រាយបញ្ហាប្រឈមចំពោះមុខបានច្រើន ទាំងការប្រើប្រាស់ដីលំអិតនៅតាមមូលដ្ឋាន ការរៀបចំស្ថាបនាផ្លូវគួរមានទំហំប៉ុណ្ណាសម្រាប់អនាគត ក៏ដូចជាការប្រើប្រាស់ និងជួយលើបញ្ហាបរិស្ថានយ៉ាងដូចម្តេច។

លោកបន្តថា “នៅពេលមិនមានការប្រើប្រាស់ប្លង់គោល រដ្ឋាភិបាលនឹងមិនអាចដោះស្រាយបញ្ហាបានងាយស្រួលឡើយ គឺនៅតែមានបញ្ហា និងត្រូវដោះស្រាយបញ្ហាមិនចេះចប់មិនចេះហើយ”។

នៅរាជធានីភ្នំពេញមានប្លង់គោល សម្រាប់អនុវត្តន៍ចាប់ពីឆ្នាំ២០១៥ ដល់២០៣៥ ប៉ុន្តែការអភិវឌ្ឍន៍រាជធានីភ្នំពេញសព្វថ្ងៃ មិនគោរពបានតាមប្លង់គោលបានល្អប្រសើរនៅឡើយទេ៕

ជប៉ុននឹងនឹងធ្វើឲ្យតំបន់ត្រីកោណកម្ពុជា-ឡាវ-វៀតណាមកំរើកឡើង

February 21, 2018

ដោយ វុត្ថា

ភ្នំពេញ៖ ប្រទេសជប៉ុនបានសម្រេចលូកដៃចូលតំបន់ត្រីកោណអភិវឌ្ឈន៍ ខណៈតំបន់ដែលស្ថិតនៅព្រំប្រទល់ដែនរវាងកម្ពុជា វៀតណាម ឡាវនេះមិនសូវមានសកម្មភាពសេដ្ឋកិច្ច និងអភិវឌ្ឍន៍ជាដុំកំភួននៅឡើយ។

អ្នកនាំពាក្យព្រឹទ្ធសភា លោកម៉ម ប៊ុននាង បានមានប្រសាសន៍ឲ្យដឹងក្រោយកិច្ចប្រជុំព្រឹទ្ធសភានីកាល៣ នៅថ្ងៃទី២១ ខែកុម្ភៈ ឆ្នាំ ២០១៨នេះថា ប្រទេសជប៉ុន នឹងចូលខ្លួនមកជួយអភិវឌ្ឍន៍តំបន់ត្រីកោណ អភិវឌ្ឍន៍កម្ពុជា-ឡាវ-វៀតណាម (CLV) ក្រោយពីប្រទេសកម្ពុជា អនុម័តយល់ព្រមលើកិច្ចព្រមព្រៀងស្តីពីការជំរុញនិងសម្រួលពាណិជ្ជកម្ម តំបន់ត្រីកោណអភិវឌ្ឍន៍កម្ពុជា-ឡាវ-វៀតណាមនេះ។

ទោះជាយ៉ាងណាលោកមិនបានបញ្ជាក់ ឲ្យដឹងពីទំហំទុនវិនិយោគដែលជប៉ុននឹងផ្តល់ជាជំនួយសម្បទាន ឬជម្រុញឲ្យក្រុមហ៊ុនឯកជនរបស់ខ្លួនចូលទៅវិនិយោគនៅតំបន់នេះនៅឡើយទេ។ គ្រាន់តែបញ្ជាក់ប្រទេសកម្ពុជា ត្រូវតែមានកិច្ចព្រមព្រៀង ដើម្បីងាយស្រូលដល់ការអភិវឌ្ឍន៍តំបន់នេះ ឲ្យមានការរីកចម្រើនដើម្បីផលប្រយោជន៍ប្រជាពលរដ្ឋ នៅតាមបន្ទាត់ព្រុំដែននៃប្រទេសទាំង៣។

លោកប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មថ្លែងថា កិច្ចព្រមព្រៀងនេះ នឹងផ្តល់អត្ថប្រយោជន៍ជាច្រើនដល់កម្ពុជា ដូចជា ទី១ បង្កើនសកម្មភាពជំរុញពាណិជ្ជកម្ម ទី២បង្កើតបរិយាសធុរកិច្ចល្អប្រសើរ ទី៣ សម្រួលបំលាស់ទីរបស់ប្រជាជន យានយន្ត និងទំនិញនៃប្រទេសទាំងបីក្នុងតំបន់ត្រីកោណ ទី៤ បង្កើន លក្ខខណ្ឌអនុគ្រោះដើម្បីសម្រួលដល់លំហូរពាណិជ្ជកម្ម និងវិនិយោគ។

លោកបន្តថា “កិច្ចព្រមព្រៀងនេះគឺជាសមិទ្ធផល នៃកិច្ចខិតខំប្រឹងប្រែងរបស់រាជរដ្ឋាភិបាល សំដៅឆ្ពោះទៅរកការអភិវឌ្ឍ ក្នុងតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម ប្រកបដោយនិរន្តភាព និងគ្រប់វិស័យ កាត់បន្ថយភាពក្រីក្រ និងគម្លាតផ្នែកសេដ្ឋកិច្ច សង្គម និងធ្វើឲ្យជីវភាពរស់នៅរបស់ប្រជាជននៅក្នុងតំបន់ត្រីកោណអភិវឌ្ឍន៍ប្រសើរឡើង”។ លោកបន្តថា កិច្ចព្រមព្រៀងនេះក៏ផ្តល់ កិច្ចសហប្រតិបត្តិការទូលំទូលាយ ក្នុងចំណោមប្រទេសទាំងបី ដែលត្រូវបង្កើតឡើងដោយផ្អែក លើចំណងមិត្តភាពជាប្រពៃណី សាមគ្គីភាព ដែលមានផលប្រយោជន៍ទៅវិញទៅមក និងភាពជាអ្នកជិតខាងល្អ”។

សេចក្តីព្រាងច្បាប់នេះត្រូវបានព្រឹទ្ធសភាកម្ពុជា ធ្វើការអនុម័តយល់ព្រមដោយឥតកែប្រែ និងចាត់ទុកជាការប្រញាប់ក្នុងសម្លេងគាំទ្រចំនួន៤៥ សម្លេង នៃចំនួនសមាជិកព្រឹទ្ធសភាទាំងមូល៕

ដំណឹងល្អ!!! សេដ្ឋកិច្ចកម្ពុជានឹងរក្សាកំណើន ៧% សម្រាប់ឆ្នាំនេះ និងឆ្នាំ២០១៩

February 21, 2018

ដោយ គង់ សូរិយា

ភ្នំពេញ៖ សេដ្ឋកិច្ចកម្ពុជានឹងបន្តរក្សាកំណើនល្អប្រសើរ ដោយកម្ពុជានឹងរក្សាបានកំនើនសេដ្ឋកិច្ច៧ភាគរយនៅឆ្នាំនេះ និងឆ្នាំ២០១៩ខាងមុខនេះ ដោយសារការជំរុញពីវិស័យបីសំខាន់ៗ។

រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុលោក វង្សី វិស្សុតបានថ្លែង ក្នុងកិច្ចប្រជុំពិគ្រោះយោបល់ ដើម្បីធ្វើការវាយតម្លៃស្ថានភាពម៉ាក្រូសេដ្ឋកិច្ចកម្ពុជាកាលពីម្សិលម៉ិញនេះថា នៅក្នុងឆ្នាំ២០១៨ និងឆ្នាំ២០១៩ខាងមុខនេះ តាមការព្យាករណ៍កំណើនសេដ្ឋកិច្ចកម្ពុជា អាចនឹងសម្រេចបានក្នុងរង្វង់៧ភាគរយ ក្នុងនោះវិស័យកសិកម្មត្រូវបានរំពឹងថា នឹងបន្តកំណើនក្នុងរង្វង់១,៨ភាគរយ វិស័យឧស្សាហកម្ម នឹងបន្តរក្សាកំណើនរឹងមាំ ក្នុងអត្រាមធ្យមប្រចាំឆ្នាំ១០ភាគរយ និងវិស័យសេវាកម្មត្រូវបានព្យាករណ៍ថា នឹងមានកំណើនខ្ពស់ក្នុងរង្វង់ប្រមាណ៧ភាគរយផងដែរ។

លោកបន្តថា “ទោះបីយ៉ាងណាក៏ដោយសេដ្ឋកិច្ចកម្ពុជា នឹងត្រូវជួបប្រទះនូវហានិភ័យ និងបញ្ហាប្រឈមមួយចំនួន ទាំងដែលបណ្តាមកពីតក្តាខាងក្រៅ និងខាងក្នុង ដូច្នេះយើងចាំបាច់ត្រូវមានអប្បមាទជាប់ជាប្រចាំ ព្រោះការមិនប្រុងប្រយ័ត្ននៅពេលមិនទាន់មានបញ្ហាកើតឡើង គឺជាហានិភ័យដ៏គ្រោះថ្នាក់មួយសម្រាប់យើង”។

លោកបន្តថា កម្ពុជាគួរត្រូវបន្តធ្វើទំនើបកម្ម មូលដ្ឋានសេដ្ឋកិច្ចរបស់ខ្លួន ទៅរកសេដ្ឋកិច្ច ដែលមានតម្លៃបន្ថែមកាន់តែខ្ពស់ និងក្លាយជាសេដ្ឋកិច្ចបង្កើតតម្លៃក្នុងរយៈពេលវែងខាងមុខ ដែលកម្ពុជាត្រូវដាក់ចេញនូវវិធានការណ៍ គោលនយោបាយចាំបាច់មួយចំនួននៅក្នុងរយៈពេលខ្លី និងមធ្យមខាងមុខ ដើម្បីទ្រទ្រង់កំណើនសេដ្ឋកិច្ច ឱ្យបន្តសម្រេចបានក្នុងរង្វង់៧ភាគរយ តាមរយៈការបន្តអភិវឌ្ឍន៍លើកកម្ពស់ក្បាលម៉ាស៊ីនសេដ្ឋកិច្ច ប្រពៃណីដែលមានស្រាប់ និងបង្កើតក្បាលម៉ាស៊ីនសេដ្ឋកិច្ចថ្មីៗផងដែរ ។

លោកបណ្ឌិតម៉ី កល្យាណទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានយល់ស្របនឹងការលើកឡើងនេះ ដោយលោកបានថ្លែងថា តាមធម្មតាយើងឃើញសេដ្ឋកិច្ចកម្ពុជានៅតែមានសញ្ញាវិជ្ជមាន ប៉ុន្តែវាទាមទារឲ្យកម្ពុជាខំប្រឹងប្រែងបន្ថែមទៀត ដើម្បីរក្សាក្រវ៉ាត់(កំនើន)នេះ ព្រោះនៅពេលទំហំសេដ្ឋកិច្ចយើងកាន់តែធំ ទំហំនៃកំនើនអាចថយចុះ ប៉ុន្តែទំហំទឹកប្រាក់នឹងបន្តកើនឡើង។លោកបន្តថា ផ្ទុយទៅវិញបើយើងខិតខំប្រឹងប្រែងទាំងអស់គ្នា ហើយយើងអាចបន្តរក្សាកំនើនសេដ្ឋកិច្ចបាន៧ភាគរយបន្តទៀត ជារឿងអបអរសាទរសម្រាប់ទាំងអស់គ្នា។

លោកបន្តថា “សេដ្ឋកិច្ចកម្ពុជាមានបញ្ហាប្រឈមដដែលៗ ប៉ុន្តែការងារនេះរដ្ឋាភិបាលបាននិងកំពុងខិតខំធ្វើបណ្តើរៗហើយ ព្រោះវិស័យអ្វីមួយមិនអាចធ្វើមួយថ្ងៃទេ វាត្រូវការពេលវេលាសមស្របមួយ”៕

កូរ៉េសុំកម្ពុជាគាំទ្រមហិច្ឆតាយក្សរបស់ខ្លួនមកតំបន់អាស៊ាន

February 21, 2018

ដោយ វុត្ថា

ភ្នំពេញ៖ ប្រធានាធិតបតីថ្មី ដែលមាននិន្នាការស្តាំនិយមបានដាក់ចេញនូវគោលនយោបាយថ្មីមួយ ក្នុងការឆ្ពោះមកតំបន់អាស៊ីខាងត្បូង ដើម្បីពង្រីកឥទ្ឋិពល និងកសាងមូលដ្ឋាននៃអំណាចសេដ្ឋកិច្ចរបស់ពួកគេ។

ក្នុងជំនួបជាមួយ សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា លោក Oh Nak-Young ឯកអគ្គរដ្ឋទូតនៃសាធារណរដ្ឋកូរ៉េថ្មី ទើបតែងតំាងថ្មីប្រចំានៅកម្ពុជា បានស្នើសុំសម្តេចប្រធានរដ្ឋសភាជួយគំាទ្រ និងជំរុញគោលនយោបាយថ្មី របស់រដ្ឋាភិបាលសាធារណរដ្ឋកូរ៉េចំពោះតំបន់អាស៊ីខាងត្បូង។

ក្នុងឳកាសជួបជាមួយប្រធានរដ្ឋសភាកម្ពុជា លោកទូតបានជម្រាបជូនសម្តេចថា ប្រធានាធិបតីសាធារណរដ្ឋកូរ៉េ លោកមូន ជេអ៊ីន បានដាក់ចេញនូវគោលនយោបាយកិច្ចសហប្រតិបត្តិការអាស៊ីខាងត្បូង ដែលសំដៅដល់កិច្ចសហប្រតិបត្តិការរវាងកូរ៉េ ជាមួយបណ្តាប្រទេសអាស៊ី-អាគ្នេយ៍។ កិច្ចសហប្រតិបត្តិការនេះ មិនសំដៅត្រឹមតែការរឹតចំណងការទូតនោះទេ តែសំដៅដល់កិច្ចសហប្រតិបត្តិការរវាងប្រជាជននិងប្រជាជនថែមទៀត។

លោក Oh Nak-Young បានបញ្ជាក់ថា “ចំណងមិត្តភាពកម្ពុជា-សាធារណរដ្ឋកូរ៉េ ដែលមានតំាងពីយូរមកហើយ បានរីកចម្រើនគួរឲ្យកត់សម្គាល់នារយៈពេលចុងក្រោយនេះ”។លោកបន្តថា “ប្រជាជនកម្ពុជា ដែលកំពុងរស់នៅ និងធ្វើការនៅក្នុងប្រទេសកូរ៉េ បានបង្កើតសហគមន៍ជាច្រើនក្នុងប្រទេសកូរ៉េ។ ចំណែកសហគមន៍ប្រជាជនកូរ៉េ នៅក្នុងប្រទេសកម្ពុជាក៏មានការរីកចម្រើនជាលំដាប់ដែរ”។

លោកបន្តា “ចំណងមិត្តភាពរវាងប្រទេស និងប្រទេស។ ចំណងមិត្តភាពរវាងប្រជាជន និងប្រជាជននៃប្រទេសទំាងពីរ គឺមានលក្ខណៈសម្បត្តិសមគួរណាស់ ក្នុងការអនុវត្តគោលនយោបាយអាស៊ីខាងត្បូង។ យើងខ្ញុំស្នើសុំ សម្តេច ជួយជំរុញកិច្ចការនេះ” នេះជាប្រសាសន៍របស់ឯកឧត្តម អូ ណាក់យ៉ុង”។

ជាការឆ្លើយតបសម្តេចអគ្គមហាពញាចក្រី ហេង សំរិន បានគំាទ្រនិងវាយខ្ពស់ ហើយបានចាត់ទុកបេសកកម្មនេះរបស់លោក Oh Nak Young មកកាន់កម្ពុជា ស្របពេលដែលទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងពីរ(កម្ពុជា-កូរ៉េ) មានការរីកចម្រើនគួរឱ្យកត់សំគាល់ លើគ្រប់វិស័យទំាង វិស័យនយោបាយ ការទូត សេដ្ឋកិច្ច ពាណិជ្ជកម្ម វិនិយោគ និងទេសចរណ៍ជាដើម។

សាធារណរដ្ឋកូរ៉េបាន និងកំពុងដើរតួយ៉ាងសំខាន់ ក្នុងការចូលរួមអភិវឌ្ឍ ប្រទេសកម្ពុជា តាមរយៈការផ្តល់ជំនួយឥតសំណង កម្ចីឥណទានសម្បទាន ដែលគំរោងនានាជាច្រើន ដូចជា ហេដ្ឋារចនាសម្ព័ន្ធ សុខាភិបាល និងអភិវឌ្ឍន៍ជនបទ ជាដើម។ ក្រៅពីនេះ សាធារណរដ្ឋកូរ៉េ ក៏ជាទីផ្សារការងារដ៏ធំ សម្រាប់ពលករកម្ពុជា។

សម្តេចបន្តថា “ខ្ញុំសង្ឃឹមថា តាមរយៈបេសកកម្មការទូត ដ៏ឧត្តុង្គឧត្តមនេះ ឯកឧត្តម នឹងបន្តខិតខំលើកទឹកចិត្តរដ្ឋាភិបាលកូរ៉េ បន្តបង្កើនចំនួនកូតា ចំពោះពលករកម្ពុជា កាន់តែច្រើនថែមទៀត”៕

ភ្ញៀវទេសចរណ៍អន្តរជាតិមកទស្សនាកម្ពុជាកើនឡើងខ្លាំងក្នុងដើមឆ្នាំនេះ

February 21, 2018

ដោយ ដួង ចន្រ្ទា

ភ្នំពេញ៖ ក្រុមប្រតិបត្តិករទេសចរណ៍នានាបានលើកឡើងថា ចំនួនភ្ញៀវទេសចរណ៍អន្តរជាតិមកទស្សនាកម្ពុជា ក្នុងរយៈពេលជិត២ខែដើមឆ្នាំ២០១៨នេះ បានកើនឡើងខ្លាំងធៀបរយៈពេលដូចគ្នាកាលពីឆ្នាំមុន។

លោកលូ ម៉េងសហប្រធានក្រុមការងារទេសចរណ៍ផ្នែកឯកជនបានថ្លែង ឲ្យដឹងតាមទូរស័ព្ទកាលពីព្រឹកថកងៃទី២១ កុម្ភៈនេះថា យើងទទួលបានភ្ញៀវទេសចរណ៍កើនឡើងច្រើនលើសការរំពឹងទុក សម្រាប់ដើមឆ្នាំ២០១៨នេះ ប៉ុន្តែយើងមិនដឹងពីមូលហេតុនោះទេ។លោកបន្តថា យើងកំពុងសិក្សារកមូលហេតុពីកំនើនភ្ញៀវទេសចរណ៍អន្តរជាតិ ដែលបានមកទស្សនាកម្ពុជាកំឡុងពេលនេះ។

លោកបន្តថា “កំនើនភ្ញៀវទេសចរណ៍មកទស្សនាកម្ពុជាកំឡុងដើមឆ្នាំនេះ កើនឡើងគ្រប់ជាតិសាសន៍ ជាអ្វីដែលខ្ញុំកត់សំគាល់ឃើញ ហើយវាជារឿងរីករាយសម្រាប់យើងទាំងអស់គ្នា”។

ប្រធានសមាគមទីភ្នាក់ងារទេសចរណ៍កម្ពុជា លោកស្រីឆាយ ស៊ីវលីនបានថ្លែងស្រដៀងគ្នាថា ចំនួនភ្ញៀវទេសចរណ៍អន្តរជាតិ មកទស្សនាកម្ពុជាដើមឆ្នាំនេះ ពិតជាកើនឡើងខ្លាំង ហើយកំនើននេះដោយសារកម្ពុជាបានភ្ជាប់ជើងហោះហើរកាន់តែច្រើនជាមួយបណ្តាប្រទេសនានា ពិសេសប្រទេសចិនដែលបានភ្ជាប់ការហោះហើរត្រង់មកកាន់កម្ពុជាកាន់តែច្រើន។លោកស្រីបន្តថា ទីផ្សារប្រទេសចិននៅមានសក្តានុពលច្រើនថែមទៀត ដែលយើងរំពឹងនឹងមានការភ្ជាប់ជើងហោះហើរត្រង់កាន់តែច្រើននាពេលខាងមុខ។

លោកស្រីបន្តថា “គោលនយោបាយទេសចរណ៍ បានបើកផ្លូវឲ្យកម្ពុជាកាន់តែទូលំទូលាយទៅកាន់ពិភពលោក ហេតុនេះខ្ញុំជឿថាវិស័យនេះនឹងបន្តរីកចម្រើនបន្ថែមទៀត”។

លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា និងជានាយកប្រតិបត្តិក្រុមហ៊ុន World Express &Travel បានថ្លែងថា គោលនយោបាយបើកចំហជើងមេឃរបស់សម្តេចតេជោហ៊ុន សែននាយករដ្ឋមន្រ្តីកម្ពុជា បានផ្តល់នូវកាលានុវត្តន៍ភាពដ៏សំខាន់ ដែលធ្វើឲ្យកម្ពុជាទទួលបានជើងហោះហើរកាន់តែច្រើនដែលរហូតមកទល់ពេលនេះ មានក្រុមហ៊ុនអាកាសចរណ៍ជាតិ និងអន្តរជាតិប្រមាណ៤៣ក្រុមហ៊ុនកំពុងភ្ជាប់ជើងហោះហើរត្រង់មកម្ពុជា។

លោកបន្តថា “ការបង្កើនជើងហោះហើរកាន់តែច្រើន កម្ពុជានឹងទទួលបានផលប្រយោជន៍កាន់តែច្រើន ទាំងភ្ញៀវទេសចរណ៍ ទាំងការវិនិយោគ និងការពង្រីកទំហំពាណិជ្ជកម្មរវាងប្រទេសជាដៃគូ”៕

អ្នកជំនាញព្រមាន ៖ អ្នកចំណាយលុយចង់ទៅរស់នៅក្រៅប្រទេសប្រយ័ត្នចាញ់បោកអ្នករត់ការ

February 21, 2018

ជាទូទៅសម្រាប់អ្នកដែលកំពុងរស់នៅក្នុងប្រទេសកំពុងអភិវឌ្ឍនានា តែងបង្ហាញពីភាពទំនោរចង់ចាកចេញទៅជ្រកកោននៅប្រទេសទី2 ឬទី3 ដែលមានការអភិវឌ្ឍ ឬមានសេដ្ឋកិច្ចល្អប្រសើរ ដោយស្របច្បាប់ និងមានការទទួលស្គាល់ពីម្ចាស់ប្រទេស ដើម្បីងាយស្រួលក្នុងការរកបានចំណូលច្រើន ដែលក្នុងនោះរួមមានដូចជាបណ្តាប្រទេសជឿនលឿនមួយចំនួនដូចជា សហរដ្ឋអាមេរិក កាណាដា អូស្ត្រាលី ញូវហ្សាលែន បារាំង និងបណ្តាប្រទេសមួយចំនួនទៀតដែលស្ថិតនៅក្នុងសហគមន៍អឺរ៉ុបជាដើម។

ជាក់ស្ដែងកាលពីពេលកន្លងទៅ ក៏ដូចជាពេលបច្ចុប្បន្ននេះ នៅក្នុងប្រទេសកម្ពុជា ក៏មានអ្នកដែលប្រាថ្នាចង់ចាកចេញទៅរស់នៅ និងប្រកបការងារ ដើម្បីស្វែងរកចំណូលឱ្យបានក្រាស់ក្រែលផងដែរ ដែលក្នុងនោះភាគច្រើនធ្វើតាមរយៈការដាក់ពាក្យស្នើសុំទៅស្ថាប័នស្ថានទូតដោយផ្ទាល់ដើម្បីបានសម្ភាសន៍ដោយមានអ្នកជ្រកកោនស្របច្បាប់នៅក្នុងប្រទេសគោលដៅជាអ្នកធានា, ការតម្កល់ទ្រព្យបញ្ចាំនៅក្នុងប្រទេសគោលដៅជាសំអាង , ការដាក់ពាក្យផ្សងសំណាងតាមរយៈការចាប់ឆ្នាត ជាពិសេសការចំណាយជួលថវិកាយ៉ាងក្រាស់ក្រែលទៅឱ្យឈ្មួញជើងសារ ឬជាភ្នាក់ងាររៀបចំឯកសារ ដើម្បីរត់ការជាដើម។ ក្នុងរូបភាពទាំងអស់ដូចបានរៀបរាប់ជូនខាងលើនេះ ត្រូវបានអ្នកជំនាញព្រមានថា វាជាការប្រថុយប្រថាន និងផុយស្រួយ ងាយនឹជួបហានិភ័យ (ភាគរយបរាជ័យខ្ពស់) ជាពិសេស ងាយនឹងចាញ់បោកខាតបង់ទ្រព្យជាខ្លាំង ដែលអ្នកទាំងនោះគួរតែងាកមកស្វែងយល់ឱ្យបានស៊ីជម្រៅអំពីនីតិវិធីច្បាប់ យល់ដឹងអំពីការរៀបចំឯកសារសំខាន់ និងលក្ខខណ្ឌអនុញ្ញាតពីប្រទេសគោលដៅជារឿងដែលសំខាន់។

លោក Bastien Trelcat អ្នកគ្រប់គ្រងក្រុមហ៊ុនប្រឹក្សាផ្នែកច្បាប់អន្តោរប្រវេសន៍ និងពាណិជ្ជកម្ម (HLG) ប្រចាំនៅកម្ពុជា បានបញ្ជាក់ថា ៖ រាល់សកម្មភាពខាងលើនេះ គឺអាចលទ្ធភាពសម្រេចបំណង ប៉ុន្តែវាមានអត្រាទាបបំផុត បើប្រៀបជាមួយនឹងហានិភ័យដែលអាចកើតមាន។ លោកបានលើកឡើងថា ៖ «តាមបទពិសោធន៍ និងតាមលក្ខខណ្ឌច្បាប់ដែលលោកធ្លាប់បានអនុវត្តជាមួយក្រុមហ៊ុនប្រឹក្សាផ្នែកច្បាប់អន្តោរប្រវេសន៍ និងពាណិជ្ជកម្ម (HLG) ដែលមានប្រភពនៅប្រទេសកាណាដា និងមានអាយុកាលជាង25ឆ្នាំកន្លងទៅនេះ បានកត់សម្គាល់យ៉ាងដូច្នេះថា ៖ « យើងទទួលស្គាល់ថា កាលពីប៉ុន្មានឆ្នាំមុន ការចង់ចាកចេញទៅជ្រកនៅប្រទេសទី2 ឬទី3 ដោយស្របច្បាប់ គឺត្រូវធ្វើឡើងដូចរូបភាពខាងលើ ក៏ប៉ុន្តែវាគឺជារឿងមួយដែលប្រថុយប្រថាន ងាយនឹងជួបហានិភ័យ។

លោកបានបន្តទៀតថា ៖ «បច្ចុប្បន្នេះ គេមិនអនុវត្តតាមរូបភាពទាំងនេះទៀតទេ។ មុនពេលសម្រេចចិត្ត អ្នកដែលមានបំណងស្វែងរកភាពងាយស្រួលក្នុងការទទួលបានសេរីភាព និងភាពល្អប្រសើរក្នុងទទួលបានសញ្ជាតិដោយស្របច្បាប់នៅតាមបណ្តាប្រទេសគោលដៅដែលខ្លួនប្រាថ្នា គឺត្រូវតែមានការយល់ដឹងឱ្យបានច្បាស់ពីលក្ខណ្ខផ្លូវច្បាប់ ជាពិសេសលទ្ធភាពរបស់ខ្លួនស្របទៅនឹងតម្រូវការរបស់ប្រទេសគោលដៅទាំងនោះ ហើយប្រសិនមិនយល់ច្បាស់អាចមកប្រឹក្សាដោយឥតគិតសេវាជាមួយអ្នកជំនាញ (HLG) ប្រចាំនៅកម្ពុជា ។ ជាការជួយសម្រួលដល់ការសម្រេចបំណងក្នុងការទទួលបានសិទ្ធិស្របច្បាប់ជ្រកកោននៅក្នុងប្រទេសគោល ពេលនេះ (HLG) ប្រចាំនៅកម្ពុជា បានផ្តល់ជូននូវកម្មពិសេសមួយ គឺការទទួលបានសញ្ជាតិតាមរយៈការវិនិយោគ ដែលគម្រោង និងកម្មវិធីនេះ មានអត្រាជោគជ័យខ្ពស់បំផុត និងមិនខាតបង់ទ្រព្យធននោះឡើយ»។ លោកបានថ្លែងទៀតថា ៖ «ក្នុងនាមជាប្រជាជាតិនៅលើពិភពលោក ការវិនិយោគលើសញ្ជាតិទី2អាចផ្តល់នូវសេរីភាពក្នុងការធ្វើដំណើរយ៉ាងពេញលេញ ។ ចំពោះការវិនិយោគនេះគេអាចធ្វើឡើងបាន2របៀប ពោលគឺតាមរយៈការវិនិយោគដើម្បីទទួលបានព្រទ្យធនវិលត្រឡប់មកវិញ និងការធ្វើការបរិច្ចាក ដែលវិធីទាំងពីរសុទ្ធតែមានប្រសិទ្ធភាពដូចគ្នា ទាស់ត្រង់ថាចំនួននៃទ្រព្យវិនិយោគ និងចំនួននៃការបរិច្ចាកមានទំហំខុសគ្នាតិច ឬច្រើនតែប៉ុណ្ណោះ » ។

នៅប្រទេស ដូមីនីកា កម្មវិធីផ្តល់សញ្ជាតិ គឺមានតម្លៃចាប់ពី10ម៉ឺនដុល្លារឡើងទៅ ដែលវាជាកម្មវិធីបរិច្ចាកមូលធនមានឈ្មោះល្បីជាងគេសម្រាប់មូលនីធីសាធារណៈ។ ជនជាតិនេះ អាចធ្វើដំណើរបាន 118 ប្រទេសដោយគ្មានទិដ្ឋាការ ចំណែកឯសញ្ជាតិ វ៉ាណាទូ វិញ អាចធ្វើដំណើរបាន126ប្រទេស ដោយគ្មានទិដ្ឋាការ ដែលនៅក្នុងនោះរួមមាន ចក្រភពអង់គ្លេស អឺរ៉ុប ហុងកុង សាំងហ្គាពួរ និង រុស្សី ជាដើម ។ វិនិយោគិន ក៏អាចមានសិទ្ធិទិញអចលនទ្រព្យសម្រាប់វិនិយោគបន្ត ឬស្នាក់នៅ ក្រោយពេលចូលនិវត្តន៍ក៏បាន ៕

ជប៉ុននឹងសាងសង់អគារឈើខ្ពស់កប់ពពកទី១នៅលើលោក

February 20, 2018

ប្រែសម្រួល វុត្ថា

ភ្នំពេញ៖ ប្រទេសជប៉ុន ដែលប្រជាជនប្រទេសនេះ តែងតែមានគំនិតច្នៃប្រឌិតបាន និងកំពុងសាងសង់អាគារធ្វើពីឈើខ្ពស់ជាងគេនៅលើពិភពលោក។

យោងតាមសារព័ត៌មាន CNN ហើយគេហទំព័រ propertyarea.asia បកប្រែក្រៅផ្លូវការបានឲ្យដឹងថា ប្រទេសជប៉ុនគ្រោង នឹងសាងសង់អគារខ្ពស់កប់ពពក សាងសង់ពីឈើលើកដំបូងបំផុតក្នុងពិភពលោក ដែលមានកំពស់ប្រមាណជា ជិត៣៥០ម៉ែត្រ ដោយគ្រោងចំណាយទុនសាងសង់ចំនួន៥,៦ពាន់លានដុល្លារអាមេរិក។ គម្រោងនេះសាងសង់ដោយក្រុមហ៊ុន Sumitomo Forestry របស់ប្រទេសជប៉ុន។

តាមផែនការអគារខ្ពស់ដែលសាងសង់ពីឈើនេះ នឹងបញ្ចប់នៅក្នុងឆ្នាំ ២០៤១ ក្នុងគោលបំណងដ៏ធំបំផុត គឺដើម្បីរំលឹកខួបអនុស្សាវរីយ៍ទី៣៥០ របស់ក្រុមហ៊ុន។

អគារថ្មីនេះ ត្រូវបានគេដាក់ឈ្មោះថា W350 មាន៧០ជាន់ ក្នុងនោះ៩០ភាករយនៃអាគារនេះធ្វើពីឈើសុទ្ធសាធ។ ឯផ្នែកខាងក្រោមនឹងប្រើប្រព័ន្ធដែកថែបពិសេសក្នុងការទប់លំនឹងអគារ ដើម្បីបញ្ចៀសពីការរញ្ជួយដី ដែលតែងកើតមានជាញឹកញយក្នុងទីក្រុងតូក្យូ។

យ៉រនៃអគារផ្ទៃខាងក្នុង និងខាងក្រៅត្រូវបានគេគិតគូពីបរិស្ថាន ដោយមានដាំស្មៅ និងរុក្ខជាតិ ដើម្បីបង្កើតសម្រស់បៃតង ក្នុងគោលបំណងបង្កើតទីក្រុងអោយបមានបរិស្ថាន តាមរយៈការបង្កើនការប្រើប្រាស់ស្ថាបត្យកម្មឈើ សម្រាប់អគារខ្ពស់ៗ។

រដ្ឋាភិបាលជប៉ុនកំពុងព្យាយាមលើកទឹកចិត្ត ឲ្យអ្នកអភិវឌ្ឍន៍ជាច្រើនឱ្យប្រើប្រាស់ឈើ ក្នុងការសាងសង់អគារនានា។ អគារនេះ ត្រូវបានគេអនុម័តក្នុងការសាងសង់នៅក្នុងឆ្នាំ២០១០ ក្នុងគោលបំណងលើកកម្ពស់ការប្រើប្រាស់ឈើនៅតាមអគារសាធារណៈនានា ក្នុងនោះអគាររដ្ឋាភិបាលទាំងអស់ ដែលមានកម្ពស់បីជាន់ឡើង ត្រូវសាងសង់ដោយឈើឬប្រើប្រាស់ឈើ។

អគារខ្ពស់កប់ពពកដែលសាងសង់ពីឈើ មិនមែនមានតែនៅក្នុងប្រទេសជប៉ុនមួយនោះទេ នៅក្នុងប្រទេកាណាដាក៏មានអាគារមួយឈ្មោះថា Brock Commons Tallwood House ដែលមានកំពស់១៨ជាន់ និងបានបំបែកកំណត់ពិភពលោករហូតដល់បច្ចុប្បន្នក៏សាងសង់ពីឈើផងដែរ។

ជាមួយគ្នានេះដែរ ប្រទេស Norway ក៏មានអគារឈើផងដែរ Treet in Central Bergenមានកំពស់១០ជាន់ ក៏បានបំបែកកំណត់ត្រាពិភពលោក ។ ប្រទេសអូស្ត្រាលី ក៏បានសាងសង់អគារពីឈើមួយដែរ ឈ្មោះ Melbourne’s Victoria Harbour បានសាងសង់បញ្ចប់ក្នុងឆ្នាំ ២០១២ កន្លងទៅនេះ៕

ក្រុមហ៊ុនអចលនទ្រព្យជប៉ុនថ្មីមួយឈានជើងចូលទីផ្សារកម្ពុជា

February 20, 2018

ដោយ ដែន ចែងចាំង

ភ្នំពេញ៖ ទន្ទឹមនឹងការរីកចំរើននៃវិស័យអចលនទ្រព្យ ក្នុងប្រទេសកម្ពុជា ក្រុមហ៊ុនជប៉ុន Japan Valuers Co., Ltd ដែលមានការិយាល័យនៅប្រទេសជប៉ុន បានចាប់ផ្តើមប្រតិបត្តិការរបស់ខ្លួនក្នុងប្រទេសកម្ពុជាហើយ តាមរយៈក្រុមហ៊ុនបុត្រសម្ពន្ធ័របស់ខ្លួនឈ្មោះ Japan Valuers (Cambodia) Co., Ltd ។

Japan Valuers (Cambodia) Co., Ltd ត្រូវបានបង្កើតឡើងរួមគ្នាដោយលោក ហ៊ីរ៉ូយូគី អ៊ីសូបេ ជាមួយលោកស៊ឹម ហ៊ុយឈ័ង។

លោកហ៊ីរ៉ូយូគី អ៊ីសូបេបានថ្លែងថា “ ខ្ញុំមានសេចក្តីរីករាយជំរាបជូនថា ខ្ញុំបានបង្កើតក្រុមហ៊ុនបុត្រសម្ពន្ធ័ថ្មីមួយទៀត នៅប្រទេសកម្ពុជា មានឈ្មោះថា Japan Valuers (Cambodia) Co., Ltd ។លោកបន្តថា “យើងមានគោលបំណងក្លាយជាក្រុមហ៊ុនមួយដ៏ល្អ ក្នុងប្រទេសកម្ពុជាក្នុងវិស័យអចលនទ្រព្យ ទាំងផ្នែកវាយតម្លៃ ប្រឹក្សាយោបល់ និងស្រាវជ្រាវ។

ជាមួយគ្នានេះ លោកបានសម្តែងនូវសេចក្តីថ្លែងអំណរអគុណ ដល់អតិថិជនរបស់លោកចំពោះការគាំទ្រកន្លងមក និងរំពឹងថា បានទទួលការគាំទ្រជាបន្តបន្ទាប់ទៀត” ។ លោកបានបន្តទៀតថា បទពិសោធន៏ និងចំណេះដឹងជាសាកលរបស់លោកទាក់ទងនឹងប្រពន្ធ័វាយតម្លៃ និងប្រឹក្សាយោបល់ផ្នែកអចលនទ្រព្យ នឹងជួយពង្រឹងស្ថេរភាព និងក្រមសីលធម៌វិជ្ជាជីវៈនៅក្នុងទីផ្សារកម្ពុជា។

លោក ស៊ឹម ហ៊ុយឈ័ង អ្នកជំនាញផ្តល់សេវាកម្មវាយតម្លៃ និងប្រឹក្សាយោបល់ផ្នែកអចលនទ្រព្យ និងគម្រោងវិនិយោគក្នុងស្រុក ដែលមានបទពិសោធន៏ជាច្រើនក្នុងទីផ្សារ។

លោកបន្តថា “ខ្ញុំមានសេចក្តីសោមនស្សជាអនេក ដែលបានចូលរួមជាមួយលោក ហ៊ីរ៉ូយូគី អ៊ីសូបេ បង្កើតក្រុមហ៊ុនបុត្រសម្ពន្ធ័ Japan Valuers (Cambodia) នេះឡើង។លោកបន្តថា “ខ្ញុំជឿជាក់ថា ការចាប់ផ្តើមនៃក្រុមហ៊ុនរបស់យើងនឹងកាន់តែធ្វើឲ្យមានទំនុកចិត្តក្នុងវិស័យអចលនទ្រព្យ និងទីផ្សារក្នុងប្រទេសកម្ពុជាយើង ពីសំណាក់វិនិយោគិនជាតិ និងអន្តរជាតិ។

លោកបន្តថា ជាងនេះទៀត វាក៏អាចជួយសម្រួលលំហូរវិនិយោគបរទេសផងដែរ ដោយសារតែការតាំងចិត្តរបស់ក្រុមហ៊ុនយើង ក្នុងការគោរពតាមក្រមសីលធម៌វិជ្ជាជីវៈ និងការធ្វើឲ្យកាន់តែមានភាពប្រសើឡើងនៃសង្គតភាព តម្លាភាព និងភាពអាចប្រៀបធៀបគ្នាបាន នៃបទដ្ឋានវាយតម្លៃអចលនទ្រព្យ និងគម្រោងផ្សេង។ យើងក៏អាចជួយទាក់ទាញវិនិយោគិនបរទេស និងជួយស្វែងរកដៃគូអភិវឌ្ឍន៍អចលនទ្រព្យផងដែរ។

លោកស៊ឹម ហ៊ុយឆ័ងបានបន្ថែមថា “ការមកដល់នៃក្រុមហ៊ុន Japan Valuers Co., Ltd ក៏បានបង្ហាញអំពីការប្តេជ្ញាចិត្តរបស់យើង ក្នុងការបម្រើអតិថិជិនឲ្យកាន់តែប្រសើរ តាមរយៈការបង្កើតការិយាល័យ និងក្រុមហ៊ុននៅប្រទេសផ្សេង។ យើងជាក្រុមហ៊ុនដែលអាចផ្តល់ពត៌មាន និងគុណភាពសេវាកម្មប្រកបដោយវិជ្ជាជីវៈ។ ការគោរពក្រមសីលធម៌ និងសមត្ថភាពវិជ្ជាជីវៈ គឺជាការកំណត់នូវភាពជោគជ័យរបស់យើងក្នុងរយៈពេលវែង។

លោក ហ៊ីរ៉ូយូគី អ៊ីសូបេដែលបានបង្កើតក្រុមហ៊ុន HIRO & Associates Inc. ក្នុងឆ្នាំ១៩៨៣ និងក្រុមហ៊ុន REAS Network Co., Ltd ក្នុងឆ្នាំ១៩៩៨។ បន្ទាប់ពីបានរួមបញ្ចូលគ្នារវាងក្រុមហ៊ុនទាំងពីរ HIRO & REAS Network ក្នុងឆ្នាំ២០០២ ក្រុមហ៊ុនថ្មីនេះត្រូវបានប្តូរឈ្មោះថា Japan Valuers Co., Ltd នៅក្នុងឆ្នាំ ២០១០ ដែលមានលោកហ៊ីរ៉ូយូគីអ៊ី សូបេជាប្រធានក្រុមប្រឹក្សាបច្ចុប្បន្ន។ ក្រុមហ៊ុន Japan Valuers Co., Ltd មានទីស្នាក់ការនៅទីក្រុងតូក្យូ និងណាគូយ៉ាប្រទេសជប៉ុន និងមានបទពិសោធន៏យ៉ាងច្រើន លើការវាយតម្លៃអចលនទ្រព្យ និងអាជីវកម្ម និងលើការផ្តល់ប្រឹក្សាលើវិស័យអចលនវត្ថុផងដែរ។

ចាប់តាំងពីឆ្នាំ២០១០មក ក្រុមហ៊ុន Japan Valuers Co., Ltd មានគោលបំណងបង្កើតបណ្តាញក្រុមហ៊ុនបុត្រសម្ពន្ធ័ជាសាកល ដើម្បីបម្រើសេវាកម្មក្នុងវិស័យអចលនទ្រព្យ ដល់អតិថិជនរបស់ខ្លួនឲ្យបានកាន់តែទូលំទូលាយ ទាំងអតិថិជនជាក្រុមហ៊ុនជប៉ុនធំៗ និងក្រុមហ៊ុនបរទេសផ្សេងទៀត។ ក្នុងឆ្នាំ ២០១៦ ក្រុមហ៊ុន Japan Valuers (Myanmar) Co., Ltd ត្រូវបានបង្កើតឡើង ក្នុងប្រទេសភូមា ហើយនៅពេលនេះ Japan Valuers (Cambodia) Co., Ltd ក៏ត្រូវបានបង្កើតឡើងឡើងផងដែរ៕

ផ្សារទំនើបលំដាប់អន្តរជាតិថ្មីមូយទៀតកំពុងសាងសង់នៅក្រុងភ្នំពេញ

February 20, 2018

ប្រែសម្រួលដោយ ៖ វុត្ថា

ភ្នំពេញ ៖ ផ្សារទំនើបលំដាប់អន្តរជាតិថ្មីមួយឈ្មោះ MIDTOWN MALL បាន និងកំពុងសាងសង់នៅតាមបណ្តោយផ្លូវលេខ ២០០៤ ដែលជាផ្សារទំនើបផ្តោតលើសហគមន៍សម្រាប់ឱកាសលក់រាយនៅក្រុងភ្នំពេញ។ ផ្សារទំនើបនេះ មិនត្រឹមតែផ្តោតលើគុណភាពនោះទេ តែផ្តោតលើការទិញទំនិញ សម្រាប់យកទៅប្រើប្រាស់នៅគេហដ្ឋាន ឬស្វែងរកមើលសម្ភារៈទំនើប ទំនិញលក់រាយ គឺជាការសំខាន់សម្រាប់ជីវិតគ្រួសារ និងជាលក្ខណៈបុគ្គល ដែលមានទីតាំងនៅក្នុងតំបន់ទឹកថ្លា ជិតសាលារៀនអន្ដរជាតិ លំនៅដ្ឋាន ការិយាល័យធ្វើការ និងផ្លូវហាយវេសំខាន់ៗ ទៅកាន់អាកាសយានដ្ឋានអន្តរជាតិភ្នំពេញ។

ក្រុមហ៊ុន Kao Cheng International Enterprise Co. Ltd ជាក្រុមហ៊ុនអភិវឌ្ឍ មានមូលដ្ឋាននៅកោះតៃវ៉ាន់ ដែលមានបទពិសោធន៍ខ្ពស់ជាមួយនឹងកំណត់ត្រា ដែលមានរយៈពេលជាង២៥ ឆ្នាំមកហើយ។ ការរចនាស្ថាបត្យកម្មត្រូវបានដឹកនាំដោយក្រុមហ៊ុនហត្ថាកសិករ និងដៃគូរបស់ខ្លួន ដែលជាអ្នកជំនាញប្រកបដោយភាពច្នៃប្រឌិតនិងបទពិសោធន៍។

MIDTOWN MALL មិនត្រឹមតែមានបំណងផ្តល់ជូន នូវជម្រើសអាហារពេលល្ងាច សេវាកម្ម និងការកម្សាន្តដែលមានគុណភាពខ្ពស់ប៉ុណ្ណោះទេ ប៉ុន្តែក៏មានបំណងបង្កើតអារម្មណ៍ជាក់ស្តែងដល់សហគមន៍ និងភាពងាយស្រួលដើម្បីបង្កើនបទពិសោធន៍ នៃការដើរទិញដូរសម្រាប់ទាំងអស់គ្នា។

តាមរយៈការបង្កើតបរិយាកាសសម្រាក ដោយមានទីធ្លាបៃតង និងបរិក្ខារឈើ ដែលមានលក្ខណៈស្ថាបត្យកម្មទំនើប ដើម្បីបង្កើតនូវបទពិសោធន៍លក់រាយចុងក្រោយសម្រាប់អតិថិជន។ តំបន់ធំៗត្រូវបានគេកំណត់ ដោយមានទាំង កន្លែងសំដែង និងការកម្សាន្ត ដើម្បីបង្កើនបរិយាកាសទាក់ទាញដែលអតិថិជនអាចរីករាយនឹងបទពិសោធន៏ ដោយមិនមានអារម្មណ៍ថាពួកគេស្ថិតនៅក្នុងផ្សារទំនើបមួយនោះទេ។

សូម្បីតែឈ្មោះក៏ត្រូវបានកំណត់ ជាទស្សនៈរបស់អ្នកអភិវឌ្ឍន៍ ដោយបានជ្រើសរើស និងពិចារណាយ៉ាងហ្មត់ចត់អំពីគោលបំណង និងទីកន្លែងនៃការអភិវឌ្ឍន៍។ MIDTOWN តំណាងឱ្យឈ្មោះផ្លូវ Maida Street និងជាយក្រុងឬទីប្រជុំជននៃធម្មជាតិ។ ឈ្មោះនេះក៏តំណាងឱ្យ ‘Middle Place’ ដើម្បីបង្ហាញថាវាជាកន្លែងដែលសហគមន៍និងអតិថិជនអាចរួបរួមបានដោយងាយ។

ផ្សារទំនើបនេះ ទទួលបានបទពិសោធន៍ពីអ្នកអភិវឌ្ឍន៍ ដែលមានការគោរពខ្ពស់ជាមួយនឹងអ្នកច្នៃប្រឌិត និងអ្នកពិគ្រោះយោបល់សំណង់ ប្រកបដោយការច្នៃប្រឌិតខ្ពស់បំផុតរបស់ប្រទេសកម្ពុជា ក៏ដូចជា ចំណេះដឹងនិងការបញ្ចូលចំណេះដឹងពីអ្នកជំនាញ ដែលកំពុងឈានមុខគេនៅក្នុងទីផ្សារលក់រាយនៅក្នុងទីក្រុងភ្នំពេញ។

ការរៀបចំចុះកិច្ចសន្យាជួល និងការរៀបចំការគ្រប់គ្រង ដែលកំពុងដំណើរការត្រូវបានរចនា និងអភិវឌ្ឍដោយក្រុមអ្នកជំនាញផ្នែកលក់រាយ និងគ្រប់គ្រងដោយ ក្រុមហ៊ុនCBRE Cambodia ដើម្បីធានាដល់ការបង្កើតបរិយាកាសការងារថិតថេរ និងធានានូវប្រតិបត្តិការដែលកំពុងដំណើរការ។ ក្រុមហ៊ុន CBRE Cambodia មានការទំនាក់ទំនងរួចហើយជាមួយអ្នកលក់រាយអន្តរជាតិ និងក្នុងស្រុកមួយចំនួន ដែលបានបង្ហាញពីចំណាប់អារម្មណ៍យ៉ាងខ្លាំងនៅក្នុងគំរោង MiDTOWN MALL៕

រដ្ឋមន្រ្តីជំរុញឲ្យសមាគមកម្មសិទ្ឋបញ្ញា និងគណមេធាវីពង្រឹងសមត្ថភាពដើម្បីដោះស្រាយវិវាទកម្មសិទ្ឋបញ្ញា

February 20, 2018

ដោយ ដែន ចែងចាំង

ភ្នំពេញ៖ រដ្ឋមន្រ្តីក្រសួងឧស្សាហកម្ម និងសិល្បកម្ម លោក ចម ប្រសិទ្ធ ក៏បានស្នើឲ្យសមាគមកម្មសិទ្ធិបញ្ញាកម្ពុជា និងគណៈមេធាវីកម្ពុជា ត្រូវពង្រឹងសមត្ថភាពជំនាញវិជ្ជាជីវៈ ឲ្យក្លាយជាឯកទេសកម្ម ផ្នែកដោះស្រាយវិវាទកម្មសិទ្ធិបញ្ញានៅកម្ពុជា ដើម្បីទាក់ទាញទំនុកចិត្តការវិនិយោគពីខាងក្រៅ ដែលត្រូវការកិច្ចការពារស្នាដៃ ជារបបគំហើញ និងភាពច្នៃប្រឌីតរបស់ពួកគេ។

លោកទេសរដ្ឋមន្ត្រី បានថ្លែងក្នុងពិធីបើកសិក្ខាសាលាស្តីពីការអនុវត្តច្បាប់កម្មសិទ្ធិបញ្ញា ដែលសហការរៀបចំដោយក្រសួងនេះ ជាមួយសមាគមភ្នាក់ងារកម្មសិទ្ធិបញ្ញាជប៉ុន និងសមាគមកម្មសិទ្ធិបញ្ញាកម្ពុជាកាលពីម្សិលម៉ិញនេះថា ក្រសួងឧស្សាហកម្ម តែងតែរៀបចំឲ្យមានសិក្ខាសាលានានា ពាក់ព័ន្ធវិស័យកម្មសិទ្ធិបញ្ញា សម្រាប់ផ្តល់ចំណេះដឹងដល់ស្ថាប័នមន្ត្រីពាក់ព័ន្ធ។ បច្ចុប្បន្នក្រសួងនៅតែធ្វើកិច្ចសហប្រតិបត្តិការ លើការងារទាំងនេះបន្តទៀត ដើម្បីពង្រីកចំនេះដឹងផ្នែកកម្មសិទ្ធិបញ្ញា ជាពិសេសប្រកាសនីយបត្រតក្កកម្ម (Patent) ដែលជាចំណេះដឹងមួយត្រូវការពេលវេលា និងការសិក្សាស្វែងយល់យូរអង្វែង។

លោកបានបន្តថា “ច្បាប់កម្មសិទ្ធិបញ្ញាមានសារៈសំខាន់ណាស់ សម្រាប់គាំទ្រឲ្យមានការបង្កើតថ្មីកាន់តែច្រើនឲ្យមានការប្រកួតប្រជែងផ្នែកពាណិជ្ជកម្មដោយស្មោះត្រង់ និងការវិនិយោគទាក់ទងនឹងបច្ចេកវិទ្យាថ្មីៗ ព្រមទាំងផ្តល់ផលប្រយោជន៍ដល់ការអភិវឌ្ឍន៍ផ្នែកសេដ្ឋកិច្ច និងសង្គម”។

ច្បាប់កម្មសិទ្ធិបញ្ញាកម្ពុជា បានអនុវត្តន៍ជាង១០ឆ្នាំមកហើយនៅកម្ពុជា ហើយកម្ពុជាក៏បានចូលជាសមាជិកសិទ្ធិសញ្ញាអង្គការអន្តរជាតិ ផ្នែកកម្មសិទ្ធិបញ្ញាជាយូរមកហើយ ជាពិសេសក្នុងរយៈពេលមួយឆ្នាំចុងក្រោយមកនេះ ក្រសួងបានចុះកិច្ចព្រមព្រៀងលើអនុស្សារណៈយោគយល់គ្នាជាបន្តបន្ទាប់ស្តីពី កិច្ចសហប្រតិបត្តិការ និងទទួលស្គាល់សុពលភាពប្រកាសនីយបត្រតក្កកម្ម ជាមួយប្រទេសមួយចំនួន ដូចជា ជប៉ុន សឹង្ហបុរី និងសហគមន៍អឺរ៉ុបជាដើម៕

1...3,0663,0673,068...3,131 Page 3,067 of 3,131